Love that comes back

 

తిరిగి రావడం 

తిరిగి రావడం ఖచ్చితంగా అవుతుంది.

పోయిందేది పోయినట్టే రాదు.

ఇంకో తీరాన్ని వెంట తెస్తుంది.

అన్నీ కలిసుంటే అన్నీ కలిసున్నట్టే.

అనకుండా పడకుండా

మాటలు ఉన్నా 

ప్రేమ ఉండలేదు. 

ప్రేమ పేరూ తీరూ గల ఏది ఉండలేదు. 

తిరిగి రావడం మాత్రం ప్రేమే కదూ.

రెండు జీవితాల కాలమంతా 

ఒక్కొక్కటిగా ఉండే వేరు వేరు కథలు.

వేరు వేరనిపించే ఒకే కథ.

తిరిగి రావడం ప్రేమ కథ.

నాకు నువ్వు 

నీకు నేను 

తప్పిపోయినప్పుడు

ఇంటికి తిరిగి వద్దాం.

ప్రేమా ఇంటికి తిరిగి వస్తుంది.

నీకు నువ్వు 

నాకు నేను

దొరకనప్పుడు మాత్రం 

ప్రేమను ఎటో పోనిద్దాం.

తానే ఇంకో తీరాన్ని

వెతికీ,

మెచ్చీ,

తాను మారీ,

తన్ను మార్చీ తిరిగి వస్తుంది.

నీ ఇంటి మధ్యలో ఆరు మూరల చాప వేసి 

అందర్ని కూర్చొబెట్టి ఒక్కొక్కరి కథ విను. 

ప్రేమ తిరిగి వచ్చిందని అప్పుడు తెలుస్తుంది. 

- కడలి 

3/1/2022. 11.53 PM