Introspection

ఏకాంతం ఒంటరితనం రెండూ వేరు వేరని కొన్ని సాయంత్రాలు చెప్తుంటాయి.

చుట్టూ ప్రపంచమంతా మెరిసిపోతోంటే మనస్సు చుట్టు చమురు పట్టినట్టు నలత చేరుతోంది.

వెలుగుల జిలుగు కంతల్లో నొప్పి కలిగిస్తోంది.

గుండెలు అదిరే ధ్వని ఎంత విపరీతమైనదో తెలుస్తోంది.

ఓ రంగుల లోకం పరాయైపోయి రంగు కోల్పోతోంది.

మనని మనమే ఎక్కడో వదిలేసొచ్చినట్టు ఊపిరి ప్రాణాన్ని వెలివేస్తోంది.

తెలియని యంత్రమేదో లోపల నుండి ఒదిగి దాగే శూన్యాన్ని తొలుస్తోంది.

మౌనం ఒకింత నయంగా అనిపిస్తోంది.

కన్నుల్లో కలలన్ని అమాంతం ధార కట్టి జారుడుబండాట ఆడతాయి.

అప్పుడు అర్ధమవుతుంది, మళ్ళీ పుట్టాల్సిన అవసరం కలిగింది అని.